ബജറ്റ്:​ ജനപ്രിയമാകുമെന്ന പ്രതീക്ഷവേണ്ടെന്ന്​ പ്രധാനമ​ന്ത്രി നരേന്ദ്ര മോദി.

ന്യൂഡല്‍ഹി: ഇൗ വര്‍ഷത്തെ ബജറ്റ്​ ജനപ്രിയമാകുമെന്ന പ്രതീക്ഷവേണ്ടെന്ന്​ പ്രധാനമ​ന്ത്രി നരേന്ദ്ര മോദി. ടൈംസ്​ നൗ ചാനലിന്​ നല്‍കിയ അഭിമുഖത്തിലാണ്​ പ്രധാനമന്ത്രിയുടെ മുന്നറിയിപ്പ്​. സര്‍ക്കാറില്‍നിന്ന​്​ സൗജന്യവും ഒൗദാര്യങ്ങളുമാണ്​ ജനങ്ങള്‍ പ്രതീക്ഷിക്കുന്നതെന്നത്​ ഒരു മിഥ്യയാണെന്ന്​ പറഞ്ഞ അദ്ദേഹം നോട്ട്​ നിരോധനം വന്‍ വിജയമായിരുന്നുവെന്നും അവകാശപ്പെട്ടു.

ഇന്ത്യയെ സാമ്ബത്തികമായി ശക്​തിപ്പെടുത്തും. അതിനായി പരിഷ്​കരണപാതയില്‍ തുടരും. ഇൗ സര്‍ക്കാര്‍ തൊഴിലവസരങ്ങള്‍ സൃഷ്​ടിക്കുന്നതില്‍ പിന്നാക്കമാണെന്നത്​ നുണപ്രചാരണമാണ്​. കര്‍ഷകര്‍ ​പ്രതിസന്ധി നേരിടുന്നുണ്ട്​. അവരുടെ വിഷയങ്ങള്‍ പരിഹരിക്കേണ്ടത്​ കേന്ദ്ര, സംസ്​ഥാന സര്‍ക്കാറുകളുടെ ഉത്തരവാദിത്തമാണ്- മോദി പറഞ്ഞു.

ഫെബ്രുവരി ഒന്നിന്​ അവതരിപ്പിക്കുന്ന ബജറ്റില്‍ ജനപ്രിയ പ്രഖ്യാപനങ്ങള്‍ ഒഴിവാക്കുമോ എന്ന ചോദ്യത്തിന്​, രാജ്യം വളര്‍ന്ന്​ ശക്​തമാവുക​യാണോ വേണ്ടത്​ അതല്ല കോണ്‍ഗ്രസ്​ സംസ്​കാരം തുടരുകയാണോ വേണ്ടതെന്ന തീരുമാനമാണ്​ ഇപ്പോഴ​ുണ്ടാവേണ്ടതെന്നായിരുന്നു പ്രധാനമന്ത്രിയുടെ പ്രതികരണം.